گواہوں کی عدم موجودگی اور مذاق میں دی گئی طلاق

کیا فرماتے ہیں علماء کرام اس مسئلہ کے بارہ میں کہ ایک آدمی نے اپنی بیوی کو مذاق میں طلاق دی اور اسی طرح رہتے رہے اس طلاق کو انہوں نے طلاق نہیں سمجھا۔ کچھ عرصہ بعد فون پر دوسری طلاق دی اور بعد میں رجوع ہو گیا۔ پھر کچھ لوگوں کی موجودگی میں تیسری طلاق دی ۔ تیسری طلاق کے بعد عورت نے اپنی عدت مکمل کر لی ۔ عد ت مکمل ہونے کے بعد آدمی نے کہنا شرو ع کر دیا کہ جب میں نے دوسری طلاق دی تھی تو میں نشہ کی حالت میں تھا۔ اس پر انہوں نے مفتی عبد الرحیم صاحب مرکز اقصى جی ٹی روڈ گوجرانوالہ سے فتوى لیا تو انہوں نے فتوى دیا کہ نشہ میں طلاق واقع نہیں ہوتی ۔ پھر اسی مسئلہ کو میں نے تسلی نہ ہونے پر دو شیوخ سے پوچھا۔ تو انہوں نے فتوى دیا کہ جب نشہ کی حالت میں بھی انسان کو ہوش اور پہچان رہے تو طلاق واقع ہو جاتی ہے۔فریقین کی تسلی نہ ہونے پر دونوں نے مذکورہ بالا بات شیخ الحدیث مولانا محمد امین محمدی حفظہ اللہ مدرس جامعہ اسلامیہ سلفیہ نصر العلوم عالم چوک کو بیان کی تو انہوں نے اس پر جواب دیا کہ پہلی طلاق جو مذاق میں دی گئی ہے واقع نہیں ہوئی۔ اور دوسری طلاق میں گواہ نہیں ہے لہذا وہ بھی واقع نہیں ہوئی۔ اس پر میں نے انہیں حدیث ثلاث جد ھن جد وھزلہن جد والی حدیث سنائی تو انہوں نے کہا کہ یہ حدیث ضعیف ہے اس میں عبد الرحمن بن حبیب ضعیف ہے لہذا یہ روایت ثابت نہیں۔ اور علامہ شوکانی کی کتاب نیل الاوطار دیکھنے کا کہا۔ اور کہا کہ اصل چیز انما الاعمال بالنیات کے مطابق نیت و عزم ہے۔ ارادہ کا ہونا ضروری ہے۔ اور کہا کہ وان عزموا الطلاق سے بھی طلاق کے لیے عزم کا ضروری ہونا ثابت ہوتا ہے۔

اب سوال یہ ہے کہ :

1- مذاق میں دی گئی طلاق واقع ہوتی ہے یا نہیں ؟ اور حدیث ثلاث جد ھن جد وھزلہن جد کی کیا حیثیت ہے؟

2- گواہوں کی غیر موجودگی میں دی گئی طلاق کا کیا حکم ہے؟

3- نشہ کی حالت میں دی گئی طلاق کا کیا حکم ہے؟ جبکہ اس نشہ میں وہ اپنی بیوی کو فون ملائے کال کرے اور اس سے باتیں کرتے ہوئے غصہ میں آ جائے اور طلاق دے دے۔